الإمبراطــور

شارف صراع الرئاسة الأمريكية على الإنتهاء وبدأ العدّ التنازلي لإعلان الإمبراطور القادم للعالم...وكثيرين بإنتظار ماستسفر عنه النتائج؟
أوباما ولا ماكين؟ماكين ولا أوباما؟

في قديم الزمان -ومش زمان أوي يعني- وأنا أقرأ روايات رجل المستحيل وملف المستقبل وكلاتاهما كانت تتضمن صراعات لمنظمات وأفراد للسيطرة على العالم كنت لا أستطيع أن أتمالك نفسي من الضحك عندما أتخيل الموقف وإن في واحد بس هو اللي هيحكم العالم ده كله ؟طيب إزاي؟ ناهيكم عن إن كل المحاولات دي كانت بتبوء بالفشل...تذكرت كل هذا وأنا بأطرح على أخي تساؤل : فكرك مين أحسن أوباما ولا ماكين؟

إحنا منتظرين تنصيب الإمبراطور الجديد وبندعي ربنا ونقول يارب يكون "حنيّن" علينا شوية ،مش زي العمّ بوش ....

يعني مصير العالم بأكمله أصبح مّعلق على "فرد" واحد ...الجميع يترقبه ... ينتظره ... يحسب حساباته ،لو ماكين هيحصل كذا ولو أوباما يبقى كذا ...

فرد واحد أصبح يتحكم بمصائر دول ....

مش عارفة حقيقي أمتى هتبقى مصائرنا بإيدينا ؟أمتى مش هنبقى مستنيين غيرنا يقرر عنّا ؟

أمتى هنبقى "أمّة" عندها شخصية مستقلة مش مجرد تابع وظل للغير؟

وإلى أن نجد الإجابة أدينا مستنيين :

أوباما

أو

ماكين

كوكتيل نـقـد

*

*

ظاهرة شائعة وباتت مستفزة جداً حقيقي ومش فاهمة أيه الفائدة اللي بتعود بيها على الناس،أي شخص ربنا

كرمه بموبايل حديث شوية بيشغل أم بي ثري وماشابه لازم طبعاً يستغل تلك المميزات أفضل استغلال فنلقيه في كل مكان في الشارع أو حتى في المواصلات العامة مشغل الأغاني بأعلى صوت وبيتنقل بينها بشكل مستفز جداً وياسلام لو كان مزاجه رايق شوية فبدأ يغني معاها

في بيبقوا حاطين الإم بي ثري في ودانهم وعايشين خالص ... أوكي براحتك طالما مش مضايق اللي حواليك

لكن المشكلة في الي بيبقوا ماشيين في الشارع أو قاعدين على الكورنيش أو راكبين مواصلات عامة ليه تفرض على اللي حواليك أنهم يسمعوا اللي أنت بتسمعه؟

ليه مابقاش في أي احترام للآخرين ومراعاة ليهم؟ولأنهم ممكن يكونوا تعبانين أو مصدعين ومش مستحملين دوشة الأغاني بتاعتك؟

ثم إني نفسي أفهم .... أيه الفائدة اللي بتعود عليهم من تصرف زي ده؟

بيحسوا بإيه يعني وهم عاملين كده؟

مش عارفة

*

*

انتهى رمضان وبدأت مواسم الثنائيات والحبيبة وأقوى العروض والمشاهد مابقاش لازم تدخل المجمّع عشان تشوفها ... لاء ممكن تشوف كل حاجة وأكتر على الكورنيش وفي ساحة مكتبة الإسكندرية

آه والله العظيم

في ساحة المكتبة هتلاقي كل ما لذّ وطاب

أنا بتعجب حقيقي من الأمن اللي مالي الساحة ومع ذلك سايبين الدنيا سايبة كده ومفتوحة على البحري

معقول يكونوا حاسبنهم ضمن السوّاح اللي ماليين المكان؟

طيب بلاش الأمن ... البنات دول ومع العلم إني عمري ماشوفت واحدة منهم لابسة دبلة

مش خايفين ؟مش هقول من ربنا لأن دي أكيد لاء .. لكن مش خايفين من الناس وإن حد يشوفهم من الجيران أو الأصحاب أو المعارف وهم في الأوضاع دي؟

ومش بقدر أمنع نفسي حقيقي من إني أسأل إزاي بنت محترمة تمسك إيد ولد غريب عنها وتمشي في الشارع عادي كده وتهزر معاه بالإيد وتتصرف معاه كأنه جوزها مثلاً أو حتى خطيبها

وإزاي دي هتقدر بضمير مرتاح تكمل حياتها عادي وتتصرف بنفس الشكل في يوم من الأيام مع جوزها المستقبلي؟ مش هتحس بأي تأنيب ضمير؟

حقيقي بضايق جداً أما مش بلاقي أي حاجة ممكن أعملها غير إني اقول ربنا يهديهم

*

*

ذاكرة مصر المعاصرة

المشروع جميل جداً ،مبذول فيه جهد كبير فعلاً ،ثلاث سنوات هي عمر المشروع ولازال العمل قائماً عليه،

موجود بشكل مبدأي وليس نهائي على هذا الرابط

عدد كبير من الصور والوثائق والتسجيلات التاريخية منها النادر جداً في كافة المجالات



أيه رأيكم بقى في شغل مكتبتنا؟ :)

مُسجّل بعلم الوصول

قررت أخيراً أن أطويك هكذا ...

كما أوراقي

وأضعك بمظروف

بلا طابع بريد

وأرسلك على أول رحلة

لمنفى الذاكرة

ولمّا طال صمتك...

وطال انتظاري...

أدركت أن من بالمنفى...

هو أنا

لا أنت

*

*

حصائد ألسنتنا

أسوأ حاجة ممكن تعملها في حياتك ،إنك "تفضفض" لحد تاني -غيرك

*

*

وهل يكب الناس في النار على وجوههم إلا حصائد ألسنتهم
صدقت يا رسول الله

*

*

أنحتاج إلى موتنا كي نحب و نعرف أن ثمة من أحبونا ؟!!
أحلام مستغانمي
مش عارفة ليه دايما مش بنحس بقيمة أي شئ غير أما نفقده ... فعلاً لو كل حد بيقدر النعمة اللي في إيديه كانت الدنيا اتغيرت ... لكن هنعمل أيه في طمع البشر

*

*
جبت لغزين للمغامرين الخمسة وميكي جيب ... بس نفسي أوي أقرأ فارس الأندلس لكن مش لقياها
مش عارفة أيه حالة النوستالجيا المسيطرة علىّ اليومين دول .....
هو في نوستالجيا للمستقبل ،أنا أعرف أنها بتبقى حالة حنين لماضي ،طيب لو لمستقبل يبقى أسمها أيه؟

*

*
جميل جداً أنك تشوف بداياتك في غيرك ...

*

*

أشمعنى البحر قلبه كبير!

بنحبك يا الله

من الأناشيد الجميلة أوي على قناة الرحمة وللي بحب أسمعها أوي وقطعته مخصوص عشان أحطه نغمة على الموبايل، نشيد "قل لا إله إلا الله"

لا إله إلا الله :)
حلو أوي .... أسمعوه

ياخالقنا يارازقنا

بنحبك يا الله

يامعينا ياراحمنا

ياواهبنا أحلى حياااة

اللهم اجعل ماتحب أحب إلينا مما نحب

دائماً ما نُقبل على الله عز وجل بالدعاء طامعين في إجابته وتلبية حاجاتنا وعوزنا، نسأله بأسمائه الحسني أن يجيب المضطر الذي يدعيه ونجلس بعدها بإنتظار الإجابة ونتساءل ... لما لم تأتي إلى الآن؟

المشكلة أننا نغفل شرط هام جداً من شروط إجابة الدعاء : أن نعطي الله حقّه أولاً قبل أن نطلب منه .... كيف أطلب منه أن يُعينني على طاعة ما وحين تتوافر أمامي الفرصة في المعصية والبُعد عنها ابتعد عنها ثم أعود بعد ذلك لرب العزة أرجوه أن يعينني عليها ؟ وأتسائل بعدها أين الإجابة؟

"إن الله غفور رحيم" ، لكن أيضاً

"والذين إذا فعلوا فاحشة أو ظلموا أنفسهم ذكروا الله فاستغفروا لذنوبهم ومن يغفر الذنوب إلا الله ولم يصروا على مافعلوا وهم يعلمون"

قال رجل للإمام الصادق ( عليه السلام ) : جعلت فداك ، إن الله يقول : (( ادعُونِي استَجِب لَكُم )) وإنَّا ندعو فلا يُستجاب لنا ؟!
قال ( عليه السلام ) : ( لأنكم لا توفون بعهد الله ، لو وفيتم لوفى الله لكم ).

اللهم ارزقنا حبك وحب من يحبك وحب كل عمل يقربنا لحبك واجعل ما تحب أحب إلينا مما نحب.